نفسي ارجع تانى صغير
نفسي ارجع تانى صغير
طفل بيلعب مش متحير
افرح واضحك وانسي الهم
وانسي الناس اللي بتغير
نفسي ارجع زي زمان
أنا والصحبة والخلان
نقعد نلعب طول اليوم
في الشارع وسط الغيطان
كنا بنصحه ونقوم بدري
نشرب شاي ونطلع نجرى
واسعه الدنيا بين ما نروح
شرقه وغربه قبلي وبحري
نلعب كوره ونلعب حجله
نعوم في الترعة ونركب عجله
ولما نجوع بيبقى غدانا
كسره وطمطامه وحتة فجله
الظهر يأذن مش بنقيل
معانا لحد الليل ما يليل
وإن غلطنا وحد ضربنا
يقلولو سيبه لسه ده عيل
كنا بنشبع ماللعب كتير
ونهارنا يعدى من غير تفكير
وأخر اليوم نقعد نتلم
نحكى حكاوي ونقول فوازير
حتى الحب كان كله براءة
مفهوش خداع أو حتى أساءه
كنا بنخجل نتكلم عنه
كنا بنحسد اللي عنده جراءه
كانت قلوبنا مفهاش عذاب
رغم انى هدومنا مليانه تراب
كنا بنزعل ايوه بنزعل
بس بنرجع تانى أحباب
ولما كبرنا كبر الهم
ومعدناش تانى بنتلم
أتغيرنا وحالنا أتبدل
وأصبح حال الدنيا يغم
دلوقتى الصفامبقاش موجود
وقلوب الناس مليانه جحود
أيام صبانا دى احلي أيام
ياريتها ترجع تانى تعود
كلمات > ابو يحيى نت
إرسال تعليق